Voatersch Weihnachtssurga


Die liebe Weihnachtszeit rückt oan,

Die gibbt merr immer viel zu denka.

Die Kinder wulln`n Christboom hoan,

Und fahln suls oo nich onn Geschenka.


Derr Paul wiel a Poar Hosa hoan,

Und a Poar neue Laderschuhe.

Derzu `n grußa Faffermoan.

A quält und läßt merr keene Ruhe.


Die Liese wiel a neues Kleed

Und bunte Schleefa ei die Hoare,

Doas ies halt keene Kleenigkeet,

Die kust`t halt Geld, die sichte Woare.


`n Sabel wünscht derr Fritze sich,

`n hucha Helm, `n lange Flinte,

Und üm a Hulzpfard quält a miech

Schunt seit derr Kerms, nich errnt bluß hinte.


Jitz kimmt mei kleenes Maxla droan,

Dam muuß iech oo`n Freede macha,

Iech keef`m halt`n Zoppelmoan,

Doo hoot doas Pärschla woas zum Lacha.



Doas wünscha olls die Kinder sich,

Doch dodermiet ies noch kee Ende,

Vergaßt ock bluß die Mutter nich,

Hier heeßts: Na, Moan, tu uuf die Hände.

Die wiel`n feina neua Hutt,

`n Mantel sul iech oo noch schenka,

Versäum iechs, is se merr nich gutt

Und meent: iech welld se ock bluß kränka.


Doo muuß ma halt Gedanka hoan,

Und muuß verstiehn, asu zu keefa,

Doß jeder hoot`n Freede droan,

Und`s derf a Geldsaak nich bereefa.


Ernst Schenke