Das Lied der Pfefferkuchenmänner

Macht ock Ploatz, nu kumma mier

Aus dem Uhfaluch herfier!

Braun un lecker sahn mer aus

Und do kimmt doas ganze haus.

Jeder wiel ins garne sahn -

Jeder ins a Kißla gahn.

Nee – doraus werd jitz nuch nischt!

Uhf a Boom irscht, nu verflischt!

Durte wulln mer irschte hanga,

Ehb se ins herundalanga.

Macht ock Ploatz, nu kumma mier -

Zahlt ock ob – eens, zwee, drei – vier -

Rechts und links werd nu morschiert,

Doas dr ins nu ooch pariert!

Denn mir sahn vum Boome aus,

Woas tutt virgiehn hier eim Haus.

Macht sich ooch de „Babe“ breet -

Weeß dar Kucha hie Bescheed -

Mir werns olla irschte soahn,

Jitze kumma mier halt droan.

Mier sein duch de Hauptpersuna,

Wega ins, do werd sichs luhna,

Weihnachta zu feiern hier -

Macht ock Ploatz – nu kumma mier!

Sazz ock, wie der Fritze leckt,

Wie`s der Gustel jitzt schunt schmeckt!

Wie`s gelist`ge Ooge plinzt!

Hoot`r schunt uhf ins geminzt?

Joa – mier hoan ooch Marzipan,

Kennt irsch nie am Kuppe sahn?

Aus Rusinka ubadruhf

Hoan mer schiene Mitzla uhf.

Und de Oogen sein aus Mandeln -

Kummt, mir wulln nie lange handeln.

Beißt euch ock a Fußla oab -

Ihr seid duch bluß inse Groab!

Hans-Christoph Kärgel