Mei Gartla

A Gartla muuß ma honn verr siech

Schien eigeteelt und ohne Viech

Gutt eigezehmt und ne zu gruuß

Doss ma sich ne obrackern muuß

Is ies zu wink a Blumrabatla

Schunn besser is a kleenes Gartla

Mit Beemla, Sträuchern und mit Bätlan

Mit Bluma, Grienzeug und mit Heetlan

An hinda eene Summerlaube

Do koan ma ausruhn wie an Taube

Ies schien, - do hoot ma viel zu tun

Zu groaba, jata und begissa

Denn die Suloate sool ne schissa

Wenns rahnt, do gieh ich nei eis Haus

Und sah vergniecht zum Fanster naus

Do sools doch watern an au blitza

Doas koan ju bluus mem Gartla nitza

Denn Rahn muuß sein, und Sunnaschein

Do koan dann olles gutt gedeihn

An au derr Wind dar darf ne faaln

Sust konnste tube Blieta sahn

Dos andre macha Binn an Hummeln

Die sich dann uff da Blieta tummeln

Die summa und die fliega rimm

Vu vorne har bis hinda nimm

Und lohn sich vu kemm Menscha schtiern

Die wulln doch kene Zeit verliern

Aus damm wert dann, siehs eene Pracht

Dar schiene Honig draus gemacht

An frieh, wenns nooch ganz duuster ies

Do sah ich naus, wie`s Water ies

Is Fanster mach ich uuf ganz leise

Do pfefft oo schunn die erschte Meise

Die huppt dan ei memm Gartla rimm

Und sitt sich schunn nooch Wermlan im

Die Laubehoa ich austaffiert

mit Bluma, wie sichs doch gehiert

An uff dos Daach an Waterfoane

Mit am geschnitzta Gockelhoane

Do sah ich wu derr Wind har kimmt

Und wie is Water sich benimmt

Doas ies dann meine klene Welt

Die mich da hier zusomma hält.

Arthur Trauschke

Aus „Schles.Bergwacht“