Kurz und bündig oder Die gude Auskunft

Doas woar letzthien

Doo wulld iech giehn

Uff Poppelwitz,

Iech fond nich hien.

Doo koam a Moan,

Dan sproach iech oan:

„Kinna Se merr nich a Wäg uff Poppelwitz soan?“

Nu hurcht ock jitz:

Dar moan blieb stiehn,

Dar Moan, dar meent`s voo Herza ehrlich,

„Och“ - meent a- „doas ies nich gefährlich“,

Und zeigt` merrsch glei mit senner Krücke,

„Doo giehn Se errschtens hier doas Stücke,

Dernoo giehn Se noch a Stücke,

Dernoo kimmt`n Brücke,

Über die Brücke giehn Se drüber,

Doo kumma Se a Stückla nimm

Und biega üm.

Glei onn derr Ecke,

Doo hoot`s`n Hecke

Und hinger dar Hecke hoot´s a Haus.

Doo is om besta, Sie weicha aus

und giehn lang naus.

Wenn Se sein lang naus geganga,

Kumma Se durch dan Puusch, dan langa.

Doo gieht`s errscht asu

Und dernoo asu,

Und dernoo gieht`s uff nunderzu.

Unda giehn Se a Stückla schräge.

Doo kumma zwee Wäge.

Dab enn loon Se liega

Und biega

Ei dan andern nei

Und macha glei

Om Teiche hien

Under zwee Linda - Sie warn schunt finda-

Is leeft sich schien.

Wenn Se dernoo uund Sie giehn wetter,

Doo hoot´`s enn Boom stiehn ohne Blätter-

`s ies a siehr verdurrter Strunk -,

Dar stond schunt durte - iech woar noch jung.

Voo durt aus, doas derfa Se nich verpossa,

Müssa Se a Quolsdurfer Kerchturm eis Oge fossa,

Doo müssa Se ganz genau Obacht gahn,

Doß Se nich errnt a folscha sahn,

Und müssa sich akkerat nooch dam Turme richta;

Denn is hoot ei derr Nähnde noch enn sichta,

Und giehn akkerat uff dan Turm druuflus,

Doo gieh Se dreivertel Stunda bluß.

Doo sein se durt und ei darselba Stunde

Kimmt ma uff Rucksdurf, doo hoot`s siehr viel Hunde.

Siehr viel gruße und kleene Luppa

Mit schmoala und mit breeta Muppa.

Doo mächta Se`n Krücke hoan,

Doß Se kännda doas Zeug verjoan,

Denn wenn ma errscht und ma wird gebissa,

Doas ies nich gutt,

Sie warn`s ju wissa,

Doo kimmt Blutt.

Jitzund, wenn Se und sein durt naus,

Doo kumma Se wieder onn a Haus -

`s ies a kleenes, gebrechliches Dings-,

Doo biega Se üm und giehn wieder links,

Doo kumma Berka -

Sie müssa sich`s merka -,

Hinger dan Berka giehn Se quar,

Doo wachsa Eecha

Om Wäge har,

Die bis nunder uff Hausdurf reecha.

Bis nunder uff Hausdurf is nich weit,

Doo braucha Se bluß noch die holbe Zeit,

Doo giehn Se bluß noch a poarmoll schräge.

Doo sein Se glei uff´`m richtiga Wäge,

Doo giehn Se bluß noch quar nüber jitz,

Doo sein Se schunt ei Poppelwitz.“

Ernst Schenke +