De Kließlan!

Die Hauptsache, doas soa ich euch,

vo ünserm schlescha Himmelreich,

doas sein doch bluß die Kließlan!

Woas nutzt a Broata, gruß und schien,

wenn uffm Tiesch Kartuffeln stiehn

als Zutoat und nich – Kließlan?

Ich woar a Pixla – su a Knirps,

a Kließla wie a hoalber Kirbs,

sust froaß ich erscht kee Kließla!

De Mutter soag merr ängstlich zu:

„Du leefst noch uff, du Vielfroaß du

vo achtahoalba Kließlan!“

Jitzt woar ich fost verlobt, - doch nee,

ich maag doas Froovulk nich, herrjeh,

de britt ju keene Kließlan!

Woas nutzt a Weibsbild, reich un schien,

wenn uffm Tisch Kartuffeln stiehn

als Zutoat und nich Kließlan?

Die Hauptsache, doas soa ich euch,

vo inserm schlescha Himmelreich,

doas sein und blein de Kließlan!

Adolf Helfer