Doas Sympathiemittel

W.Matzke

Die Schulza Pauan woar schunt lange krank. Obgleich se irscht eia vierzigan woar, zum Starba hoatte se doch nooch keene Lust. Der Dukter koam oalle Wucha zweemoal un zweemoal wurde eim Woarmboade de verschriebne Medizin gehullt.

Noatürlich kriechte se au voo oalla de se besuchta, oallerhand gude Roatschläge, oaber au reen nischte schlug bei ihr oa. Oalle aale Dukterbücherwurda studiert, eim siebenta Buch Mosis wurde noachgeschloarn, ies siebenmoal versiegelte Buch wurde dorchgeblättert, ies Punktierbuuch wurde befrurt, de Krummhübler Loaboranta hullta de besta Kräuter azu, oaber ies woar wie behext, nischte hulf. Jo, wenn ma blußig endlich gewußt hättewoas doas eegentlich für an Krankheet sein muchte. Assa un Tranka schmackta asuweit, oaber se wurde immer winger, un wenn se uufstiehn wullde, woar se suu schwach, doaß se nabern Bette umkippte. Ei Stonsdurf hullte ma bemm Fiedler Förschter doas berühmte Dachsfett, an Koatze wurde drinne gebrutt, suu stoands ei dam enn Buche.

Goar wurchig ging ihr doas Assa nei, oaber woas macht a Kranker nee oalls, wiela gesund waan. De Schmerzen woarn freilich zu ertroan, bluß de Kroaft fahlte ihr, se kunte siech äben nee uffa Benn haaln.

Oaber woas andersch oals ihr Leida macht`r mit derr Zeit zu schoaffa, `s besuchta se jitzt au öfters Weibsleute de kenn Moan hoatta, un de versuchta, mittm Pauer zu liebäugeln. Goar uffte sorte se jitzt zu ihrer besta Freundin – ob de wull uff menn Tud woarta?

Nee, asu weit doarfs nee kumme, meente de jitzt, glei murne gieh iech ei de Hoarte (Hartau), durrt kenn iech a Weib, de hoat a Buuch, doa stiehn viel Sympathiemittel drinne, ies müßta ju oalle Stricke reißa, wenn kees derrbeine wär, woas nee au dir halfa täte.

Un richtig, ies stoand ees drinne, derr Mond sulle halfa. Mit Fansterschweeß die Beene eireiba un vumm Vullmonde beschenn loon. Glei wie derr nächste Vullmond woar, wurds gemacht, un zwoar oalle drei Vullmondnächte.

Woas kee Mensch ferr möglich gehaaln hoatte, troat ei, Fansterschweeß un der Glaube droa, toata Wunder. Noach drei Wucha kunnte de Schulza-Pauan uufstiehn un se ies recht aalt gewurn. Seit damm Taage goalt bemm Schulza-Pauer der Fansterschweeß oalls, sugoar seine Boartflechte wurda doamit luuß.

Entnommen aus einem alten Sympathiemittel-Buch unter geretteten alten Schriften.